- 743 -

1449. Juni 9. Liegnitz.

Herzogin Elisabeth bekennt, dass die Gebrüder Brauchitsch sich ihrer Ansprüche auf den Salzmarkt zu Brauchitschdorf und an die Stadtheide begeben haben.

Wir Elysabeth von gotes genedin herczogynn in Slesien vnd fraw zcu Lignycz vnd czum Goltberge bekennen offennlichen mit disem briefe allen den, die en sehen, horen adir lesen, das vor vns kumen sind dy erbarn vnd woltuchtigen Hanns Brawchattsch, vnd Caspar vnd Bernhartt Brawchattsch gebruder seyne vettirn zcu Brawchszdorff gesessen in vnserm Lignitschem weichbilde gelegen, vnsir libe getrawen, wolgesunt leibis und der synnen vnbetrogen vnd haben vor sich vnd alle ire erben vnd nochkomen besitczer desselben gutis vnd dorffis von aldirs Crossenig, nw Brawchittschdorff genant, mit gutem willen vnbetwungen recht vnd redlichen abegetreten vnd vffgeloszin den ersamen vnd weysen vnsern liben getrawen rathmannen vnsirer stat Lignycz, dye yczund seintt vnd allen, die noch en werden von der stat wegen vnd zcu der stat handen alle eris rechten vnd gerechtikeyt, zcuvorsichts vnd forderung, dy sy meynten zcuhaben adir ymmer gehaben adir gewynnen mochten, is were von aldir awszsaczung wegen, aldir besiczung, von rechte, von genodin, yon freyheyt erer eldirn briefe, adir wy sy die ymmer gewynnen adir behalden vnd en geburen mochten, welirleye gerechtikeytt halben keyns awszgenumen, an dem salczmargkte doselbsten salcz zcukewffen adir zcuvorkewffen adir awszczuschencken, in vnd mit welchirley mosze vnd weysz das geschehen mochte vnd auch in vnd uff erer statheyden, als von freyheyten, freyen furen, holczhawen, lesen adir lawben, wy man das alles benennen adir nochmols irdencken mochte, keynes awszgenumen vnd haben sich des ken en gancz, gar vnd entlich geewssint vnd vorczegen vnd das alles abegeton vnd vbirgeben, also vornemlich, das furdirmer sy vnd alle ire erben vnd nochkomen besiczer desselbin dorffis zcu Brawchittschdorff vnd alle die iren doselbsten noch in seynen grenyczen vnd zcugehorungen fürbaszmer salcz bey groszin adir kleynen moszin noch in keynerley weysz kewffen noch vorkewffen vnd keyner freyheytt noch fure uff erer heyden haben sollen noch enmogen noch auch zcugestaten zcu ewigen geczeyten. In crafft vnd macht disz briefis, an den wir zcu worem bekenthnusz vnszir ingesegill haben loszin hengen, der gegeben ist zcu Lignicz am montag noch dem sontag Trinitatis noch Cristi vnsers hern geburd virczenhundirtt jore vnd dornoch in dem newnvndvirczigisten jore. Dobey sind gewest vnsir liben getrawen herre Cristoff Dornheym ritter, Heincz vnd Stephan Roth-kirche von Panthnaw, Hanns Seydlicz, Lewtter Dobirszwycz, Hanns Borwycz, Hanns Eychholcz vnd Petrus Lindner vnsir schreibir, dem disir briefe bepholhen ward.

O. d. St. L. No. 397. Das vorige Siegel an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866